يقول القارئ والمواطن المصري سامي البحيري إنه بلغ السبعين تقريبا، وعاش في مصر الملكية، ومصر عبد الناصر، والسادات، وحسني مبارك… ثم هاجر الى أميركا.
يقول إن الإسلام طوال ستين عاماً من حياته كان شيئاً آخر، «مختلف حبتين عن دلوقت»!
كما يقول بلهجته المصرية المحببة، التي نفهمها جميعاً، بسبب تأثير الأغنية المصرية الرائعة وأفلام مصر، وتأثير مدرسيها، وثقافتها، هذا غير سابق مسلسلاتها.
يقول سامي: ملاحظاتي عن الدين زمان أقدر أتذكر الآتي:
١- ماكناش نعرف ولا واحدة محجبة في مصر كلها غير «أم محمد» اللي كانت بتشتغل عند أحد قرايبنا.
٢- ماكانش فيه رجالة عندهم زبيبة في الوجه غير اللي كان بيشتغل في العجيل بتاع وسط البلد.
٣- عمري ماشفت راجل في الشارع لابس جلابية قصيرة ولا ستات منقبات.
٤- ماكانش فيه ستات بتروح تحضر درس ديني عند سوسو صاحبتهم مع الشيخ عبدالصبور اللي بيعرف دينهم أكثر.
٥- البرنامج الديني الوحيد على التلفزيون كان «نور على نور» يوم الجمعة قبل ماتش الكورة، وكان بيقدمه أحمد فراج وكان بيلبس بدلة، واتجوز المطربة صباح يوماً ما.
مش شيخ في كل برنامج.. ناقص بس طبق اليوم!
٦- ماكانش فيه حد بييجي البيت زيارة ويقعد يعمل هيصة ويسأل إذا كان عندنا سجادة صلاة أو اتجاه القبلة فين؟.. كانوا بيصلوا من سكات.. ده ان حسينا بيهم أصلاً..
٧- الناس عمرها ما كانت بتوقف شغلها أو اجتماعاتها علشان يلحقوا الظهر والعصر.
٨- الناس كانت بتحج مرة واحدة في العمر، وماكانوش بيروحوا عمرة كل سنة، ولما يروحوا كانت الستات بتلبس أبيض في أبيض مش اسود زي دلوقتي..
٩- الحي كله كان فيه جامع واحد ومافيش زاوية تحت كل عمارة.. وما كانش فيه ميكروفونات صوتها عالي.
١٠- ماكانش حد بياخد دروس في التجويد.
١١- عمرنا ما كنا نسمع بابن فلان والشيخ علان ولا كل الناس اللي بنسمع عنها دلوقت.
١٢- ماكانش فيه شرائط قرآن بصدى الصوت.
١٣- عمرنا ماكنا بنسمع عن عذاب القبر والثعبان الأقرع.
١٤- الشيوخ اللي كانوا بيطلعوا في التلفزيون كانوا بيطلعوا ببلاش لنشر الدعوة مش علشان يعملوا قرشين… أو ملايين!
وكانت في دولة تراقب وتمنع وتمسك اللي يغذي الفرقة بينا.. وماكانش فيه مشايخ أسامي وألقاب بتكفر وتفرق.. تفرق بين المصري والمصري.. بين المسلم والمسيحي، بين الشيعي والسني.. بين الست والراجل.. بين المحجبة والمش محجبة.. بين المنقبة والمحجبة.. واللستة تطول!
١٥- عمرنا ما اهتمينا ولا سألنا زمايلنا في المدرسة هم مسلمين ولا مسيحيين؟
١٦- الأرض كانت كروية لغاية لما الشيخ الفلاني ظهر وأفتى ان الأرض مسطحة.
١٧- لما حد كان بيخلف طفل كانوا بيعملوله سبوع مش عقيقة.
١٨- لما كنا بنرد على التليفون كنا بنقول ألو مش ألو سلامو عليكو.
بصراحة وحشني.. الإسلام اللي اتولدت عليه.. واتربيت على مكارم أخلاقه..
مش بنفاق ودروشة!
بذمتكم.. ألا تتفقون معه؟

أحمد الصراف